Curfá:
Och, och, ochón, is breoite mise
Gan chuid gan chóir gan choip gan choiste
Gan sult gan seod gan spórt gan spionnadh
Ó seoladh mé chun uaignis.

Slán go héag dá saorfhir shuairc,
Dá dáimh dá cléir dá héigs' dá sua,
Do m'chairde cléibh gan chlaon gan cluain,
Gan cháim gan cháin gan chraos gan chruas.

Curfá

Is fánach faon mé, is fraochmhar fuar,
Is támhlag tréith 's is taomach trua,
I mbarr an tsléibhe gan aon, monuar,
I m' pháirt, ach fraoch is gaoth aduaidh.

Curfá:
Och, ochón, mo bhrón, mo mhilleadh,
Iomarca an óil is póga bruinneall
'Chuir mise lem ló gan fód gan foithin
Is fós gan iomad fuadair!

Slán thar aon don bhéith ná luaim-
'Sí an bhánchuis bhéasach bhéaltais bhuach
'Chuir tráth chun sléibhe mé i gcéin am ruaig-
Is í grá mo chéibh, b'í in Éirinn cuach!

Curfá

Don tsráid nuair 'théim mar aon ar cuaird
Ní háil leo mé is ní réid lem chluain-
Bíd mná le chéile ag plé, dá lua
Cá háit, cá hé, cá taobh ó'r ghluais.

Curfá

Dom chairde im ghaor gan téacht, is trua,
Is mé am chrá ag an saol i ngéibheann guais;
Le ráithe i bpéin i gcéin ar cuaird
Gan ábhacht gan scléip, gan scéal dá lua!

Curfá

Ó dháil an chléir dom céile nua
Cois Mháighe go héag ní hé mo chuaird,
Go brách lem ré táim réidh lem chuaich
Is le mnáibh an tsaoil 'chuir mé ar buairt!